९५. चंद्रावरतीं दोन गुलाब

९५. सहज दृष्टिला घडला लाभ
चंद्रावरतीं दोन गुलाब ॥धृ.॥

उंच इमारत संगमरवरी
उभी गवाक्षी यवन सुंदरी
पडदा सारून बघे बावरी
गोल चेहरा नयनिं शराब ॥१॥

पथक सोडुनी वेळ वाकडा
थयथय नाचत अबलख घोडा
वरिल मराठा गडी फांकडा
दुरुन न्याहळी तिचा रुबाब ॥२॥

किंचित्‌ ढळती निळी ओढणी
भाळावरती हळुच ओढुनी
तीहि न्याहळी त्यास मोहुनी
नयनांचे मग मुके जबाब ॥३॥

तोंच येउनी भिडली काना
राघोबाची मेघगर्जना
नगरपार ही चलुं द्या सेना
वळला घोडा सरला लाभ ॥४॥

अटकेवरतीं झेंडा रोवुनि
पुण्यास आल्या परत पलटणी
तरीहि त्याच्या मनीं लोचनीं
तरळत होतें एक ख्वाब ॥५॥

गीतकार :ग. दि. माडगुळकर
गायक :गजाननराव वाटवे
संगीत :गजाननराव वाटवे