१५६. अरे मनमोहना,

१५६. अरे मनमोहना,
कळली देवा तुला, राधिका रे राधिका
कळली राधिका रे कळल्या गोपिका
साधी भोळी मीरा तुला कळली नाही
तुझी माझी प्रीत कधी जुळली नाही ॥धृ.॥

सात सुरांना तन-मन नाचे
तालावरती मधुबन नाचे
एक अबोली होती फुलली
तिच्याकडे नजर तुझी वळली नाही ॥१॥

धुंद सुगंधई यमुना लहरी
उजळून आली गोकुळ नगरी
जीवन माझे अंधाराचे
काळी काळी रात कधी टळली नाही ॥२॥

उन्हात काया, मनात छाया
कशी समजवू वेडी माया
युग युग सरले, डोळे भरले
आशेची कळी कधी फुलली नाही ॥३॥

गीतकार : माहित नाही
संगीतकार : एन्‌. दत्ता
गायक :आशा भोसले
चित्रपट : बाळा गाउ कशी अंगाई [१९७७]