१६३. अपराध मीच केला, शिक्षा तुझ्या कपाळी ।

१६३. अपराध मीच केला, शिक्षा तुझ्या कपाळी ।
जाणीव हीच माझ्या जीवा सदैव जाळी ॥धृ.॥

जन्मात एक झाली ही प्रीतभेट देवा
डोळ्यांतुनी हळू या हृदयात पाय ठेवा
बोलू न द्यायची मी भलतेच लाभवेळी ॥१॥

राष्ट्रार्थ जन्मलेला मी पाहुणा क्षणाचा
भासात गुंतवावा मी जीव का कुणाचा ?
अक्षम्य चूक झाली, मी प्रीत दाखवीली ॥२॥

तू लाख पीडितांचा आधार अन्‌ विसावा
हा पोच मूढ माझ्या प्रीतीस का नसावा ?
मी संत मोहवीला जो मग्न संतमेळी ॥३॥

आता पुढील जन्मी संसार मी करीन
ही स्वप्नभेट वक्षी मी तोवरी धरीन
सद्भाभाग्य हे सतीचे मिरवीन नित्य भाळी ॥४॥

गीतकार : ग. दि. माडगूळकर
संगीतकार : सुधीर फडके
गायक : मालती पांडे, सुधीर फडके
चित्रपट : वंदे मातरम्‌ [१९४८]