६०. तूच मायबाप बंधू तूच प्राणसखा

तूच मायबाप बंधू तूच प्राणसखा
दीन दु:खितांचा एक तूच पाठीराखा ॥धृ.॥

धरित्रीची शय्या देशी आभाळाची छाया
जाणिवेच्या पलीकडे उभी तुझी काया
परी तुझ्या ओळखीला माणूस पारखा ॥१॥

तुझ्या हाती असे एक पुरातन काठी
आवाज न येई तिचा दिसे ना कुणा ती
कुणा देतसे आधार कुणाला तडाखा ॥२॥

सज्जनांचा कैवारी तू दुर्जनांचा वैरी
अनाथांच्या नाथा तुझी रूपे नानापरी
तुझ्याविना उभा जन्म होईल पोरका ॥३॥

गायक : श्रीकांत पारगावकर
संगीत : भास्कर चंदावरकर
गीत : सुधीर मोघे
चित्रपट : एक डाव भुताचा (१९८२)