नाचनाचुनीं अति मी दमलें, थकलें रे नंदलाला ! ॥धृ.॥
निलाजरेपण कटिस नेसलें, निसुगपणाचा शेला
आत्मस्तुतीचें कुंडल कानीं, गर्व जडविला भाला
उपभोगांच्या शतकमलांची, कंठिं घातली माला ॥१॥
विषयवासना वाजे वीणा, अतृप्ती दे ताला
अनय अनीति नूपुर पायीं, कुसंगती करताला
लोभ प्रलोभन नाणीं फेंकी, मजवर आला-गेला ॥२॥
स्वतःभोवतीं घेतां गिरक्या, अंधपणा कीं आला
तालाचा मज तोल कळेना, सादहि गोठुन गेला
अंधारीं मी उभी आंधळी, जीव जीवना भ्याला ॥३॥
गायिका : आशा भोसले
गीतकार : ग.दि. माडगुळकर
संगीत : सुधीर फडके
Subscribe to:
Post Comments (Atom)
No comments:
Post a Comment